أكثر 25 موقع يزورهم المصريين ما بين مواقع التواصل الإجتماعي والتواصل الغير اجتماعي

This summary is not available. Please click here to view the post.

المرة دي كتير كده يا مصريين

إللي يعرفني يعرف إني مش باقلل من حجم مبارك أبدأً ... ده راجل عرف يفضل في الحكم ثلاثين سنة ... إشي فساد وإشي محسوبيات وإشي ضياع أموال عامة وإشي صفقات مشبوه مع إسرائيل وإشي ألعاب مع أمريكا وإشي قمع وإشي تعنت وإشي تعتيم إعلامي وإشي تزوير وإشي بطانة فاسقة .... الراجل بسم الله ماشاء الله ماخلاش.

وأخرها ضحك علي دقون شعب متربي في مؤسسته التعليمية والأمنية والسياسية ... شعب إتقاله إن المتظاهرين هما السبب في إنك قاعد دلوقتي من غير داخلية تحميك ... طب والمظاهرات مالها ومال إن السجون مش متأمنة فمساجين مصر من طره وأبو زعل ووادي النطرون والفيوم يعرفوا يهربوا في يوم واحد ... بسم الله ماشاء الله علي الآداء والتنسيق الإجرامي الواعي.

ويقوم يكمل لعبته ... أنا مش نازل المرة الجاية الإنتخابات ... سيبوني التسع شهور الجايين أرتب مين هاييجي بعدي وهايحميني إزاي زي ما أنا لحد النهاردة حامي الفساد إللي حصل من أيام السادات (مع الإعتذار لأحمد زكي) ... تقوم الناس إللي مش فاهمة إنه كده بيفلت من الحساب تقول الراجل عمل إللي عليه ... سيبوه بقا يكمل شغله .... ماهو أصله كان ظابطها قوي من غير قلق لما هايعرف يخليها جنة في تسع شهور.

تكمل بقا حرقة الدم لما تشوف إللي بيقولوا إن مبارك القائد والرمز وإحنا مانهينش رموزنا .. بس رموزنا تهيننا إحنا مفيش مشكلة ... هو الصراحة رمز فعلاً .. بس رمز الفرعون ... رمز النمرود .... رمز هامان.

الترويش إللي في الموضوع إنه ماعملش حاجة فعلاً ... لا حاسب حبيب العدلي ولا عزل أنس الفقي ولا حاسب أحمد عز وحبس صفوت الشريف ولا اي حاجة خالص ... ياولاد هاتروحوا الملاهي لو قعدتوا مؤدبين ... هييه بابا ودانا الملاهي وجابلنا أيس كريم كمان !!!! إيييييييييييييييييييييه ... إيه العبط ده ... الناس إتعملها عملية إستأصال مخ إمتي ؟؟؟

نيجي بقا للإعلام المخل والمهين ... مش التليفزيون المصري ده إللي قعدنا عشر أيام مش مصدقينه ؟؟ ولا كان فيه واحد بيتفرج عليه ومصدقه وأنا ما أعرفش !!! هو صحيح زمن المعجزات خلص ... بس بردو ربنا قادر علي كل شيئ ... المهم ... الإعلام فجأة يطلع يقول حشود مؤيدة لمبارك ... طب كانت فين دي الأيام إللي فاتت ... يعني هو لازم يقول مش هاترشح علشان الناس ترجع تحبه !!! طب بلاش ... حكم إنت عقلك ... أنا طالع أقول نعم لمبارك .... أطلع بجمل ؟ .... طب إيه ... طالع أقول نعم لمبارك أطلع بقنابل مولوتوف !!!!!!!!!!!!!! ماهو بردو المتظاهرين بسقوط النظام دوول إللي كانوا بيفتشوا الناس علشان ماحدش يدخل بسلاح ... يبقي جت منين قنابل المولوتوف؟؟

نيجي بقا للي خايفين علي أكل عيشهم .... الفضائيات إللي كلها تعلمت الدرس ... هاتقول الحقيقة هانقفلك مكتبك ... هاتقول سلام وإستقرار ولا للفتنة هافتحلك بدل القناة ثلاثة وهاعملك كليبات فيها ناس بتنوح ولابسة إسود ... هاتحمرئ هاحط عليك وهاسحب ترددك وتصريحك ... ولا إنت أقوي من الجزيرة.

عزيزي الرئيس مبارك ... سيلعنك التاريخ حتماً ... وستبقي ذكراك كفرعون سيدنا موسي رمز للشر والفساد والعناد ... عزيزي الرئيس مبارك ... حسبنا الله ونعم الوكيل.

نظام مبارك ... مش هاتقدر تغمض عينيك

عمر سليمان وحظر التجوال

من ناحية حسني مبارك يعين عمر سليمان رئيس جهاز المخابرات نائب لرئيس الجمهورية، ومن ناحية تانية تعيين الفريق أحمد شفيق رئيس للوزارء وهوا وزير الطيران المدني وإللي كان قائد القوات الجوية لمده ست سنين.

ده بيقول بيقول إن حسني مبارك مش قادر يمسك قبضة كاملة علي النظام دلوقتي ... هوا أنا لوحدي إللي واخد بالي إن الجيش مش مفعل حظر التجوال بأي شكل، أنا حاسس إن فيه حد في الجيش واقف قصاد قرار نزول الجيش لتفعيل حظر التجوال، أنا وجهة نظري إن مبارك بيحاول يعقد أكبر كمية ممكنة من الصفقات مع أكبر عدد من الرؤوس في المؤسسات الأقوي في مصر، ومحاولة منه للحفاظ علي بقايا النظام .... ربنا معاكي يا مصر وربنا يزيح الغمة بقا.

بردو لو بصينا إن فيه كلام إن جمال وعلاء مبارك في لندن دلوقتي ... وتم إقالة أحمد عز من الحزب فعلا ... وأحمد نظيف بخ ... أعتقد إن مجموعة جديدة من الوشوش هاتظهر دلوقتي ... السؤال دلوقتي ... يا تري مبارك هايفضل واحد منهم ؟؟؟

إصحي يا مصر

اصحى يا مصر

اصحى يا مصر

هزى هلالك

هاتى النصر

كونى يا مصر وعيشي يا مصر

مدي اديكى

وطولى العصر

اصحي وكوني وعيشي يا مصر

اصحى يا عامل مصر يا مجدع

وافهم دورك

ف الوردية

مهما بتتعب

مهما بتصنع

تعبك رايح

للحراميه

جهدك عملك

رزق عبالك

عرقك مرقك

ولا يهنا لك

اصحى يا عا مل

غير حالك

صون المصنع

واصنع مصر

اصحى وكونى وعيشي يا مصر

اصحى يا زارع مصر الخضره

قدره وخضره

ونور وجمال

ابدر غيطك

واحمى البدره

ضد الافه

والاستغلال

ارضك عرضك

باب الدار

صبحوا مداسه

للسمسار

نعطش

ولانشربش عكار

وصفه قالوها الحكما يامصر

اصحى وكونى وعيشي يا مصر

واصحى يا جندى

يا تار الشهدا

عمى وخالك

اختى واخوك

لجل ما تهدا وتارك يهدا

فرغ نارك ف اللى خانوك

يابن الشعب يا حامي الشعب

انت املنا فى يوم الصعب

اصحى يا جندى ودق الكعب

حرر مصر وطهر مصر

اصحى وكوني وعيشي يا مصر

قالوا عن الإنتخابات هذا العام

أستقوفتني السنة دي كثافة ما كتب في المنتديات والمواقع الإجتماعية زي الفيس بوك والتويتر عن إنتخابات مجلس الشعب في مصر هذا العام ... ومن أبرز إللي قريته:

بكرة المجزرة يامصريين هههههههههه. اللي قرفان من ريحة الانتخابات يروح يبطل صوته .. علم على أسماء كل المرشحين وبكدة يكون صوتك باطل بدل ما يعلموا هما ع اللي عايزينه آخر اليوم بحماية بلطجية الحزب البلطجي قصدي الوطني .. على فكرة مواليد من 82 ل 92 بالرقم القومي

- ده أحد الأصدقاء صبيحة الإنتخابات بيفكر يحل المشكلة بشكل موضعي ... زي إنه ياخد مسكن بدل ما يروح للدكتور

اللهم أجعل تدبيرهم تدميرهم

- وده فوض أمره لله

Ma tente5bene ya mama awam ya mama ... Da elwatany haya5odny bel tazweer ya mama :D

- وده ضرب خالص ولقي إن الهيس هوا الحل

YA RAB MORASHA7E EL WATANY YET3ADLO WE TB2A 2OR3A :D

- وده رجع للماضي القديم لما كان بيلعب كولو بامية في حوش المدرسة 

هوبا هوبا هوبا .. تامر تحت القبة. هههههههههههه والله مانا عارف دة مجلس شعب ولا سوق خضار

- وده نفس صاحبي إللي كان بيتكلم علي المجزرة فوق ... بس واضح إن التزوير نجحه هوا بالغلط بدل مرشح الوطني ... والملاحظ إنه لسه بيضحك

بكل حب وصفاء وسناء ودعاء ورجاء مبروك للحزب الوطنى :) أكتســــــــــــــــــــــــــــــــــــــــــــــــاح

- ياااااه .. كلمة إكتساح دي ما سمعتهاش من أيام الـ 99% بتاعة عبد الناصر الله يرحمه ويرحم إللي زورهاله ساعتها

ليه الوزراء يبقى ليهم حق الترشح في مجلس الشعب أصلا؟ وكمان يكسبوا؟ هو ينفع واحد يبقى ممثل للحكومة وممثل للشعب في نفس الوقت؟ يعني يغني ويرد على نفسه؟ المفروض بقي يسموا مجلس الشعب الجديد ده بعد نجاح كل الوزراء في الانتخابات مجلس الوزراء

- وده حد فكر يسأل سؤال بجد ... وده وقته يا دكتور ... علي رأي جيم كاري It's showtime

هذا وبعد ماشهدته مصرنا الحبيبة من تزوير معتاد لانتخابات شكليه لا يسعني في هذه الظروف الا ان اقول ....يا خونه انا ماشي

- خدني معاك

ياخبر أسود . انا نفسي أسأل الناس دي سؤال واحد ... انت تعرف ربنا ياعم الحاج؟؟؟ تسمع عنه؟؟؟

- وده تعليقاً علي فيديو مصورين فيه التزوير في قلب اللجنة .. بس عجبتني كلمة تسمع عنه دي

ازاي ممكن حد يستحمل انه يمارس تمثيلية 40 سنة ؟...بجد ...بتخدعوا مين ؟

- ده واحد صاحبي مش فاهم ... أنا بانصحه يروح أي إجتماع في الحزب الوطني وهوا يفهم

شيء مضحك الناس اللي بتتكلم عن مقاطعة الأنتخابات مع العلم ان معظم الشعب المصري لا يمتلك بطاقة أنتخابية أصلاً

- وده حد محترم جدا قرر يفكر بجد ... أحب أقوله هاتتعب

اللي رايح ينتخب يتصل بأي حد كان مزعله ويصالحه وقبل ما ينزل يبوس على إيد أبوه وأمه ثم يتوكل على الله

- وده في يوم الإنتخابات قرر يأمن ضهره

Cairo 2010

هيا دي مصر النهاردة .. أنا ماشفتش الكلام ده أيام إنتفاضة الأمن المركزي ... ربنا ينتعك بالسلامة يا مصر

ماهو مجلس رقاصات أصله

دينا تتراجع عن خوض انتخابات مجلس الشعب وتتفرغ لـ"دقى يامزيكا"

والله أنا شايف إن المفروض إنها تدخل المجلس فعلاً ... فإنه الصراحة دلوقتي لا يليق بحد إنه يدخل المكان ده غير الرقاصات وولاد الش## ...  مشيها ولاد الشعب ... بس بجد أنا جي في بالي السيدة الفاضلة فيفي عبده لما كانت واقفة علي خشبة المسرح وقالت جملتها الخالدة.

إحنا في زمن حزمني يا بابا

إللي بالي بالك هو الحل

في ظل أزمة الإخوان الجديدة في الإنتخابات (وهما الصراحة كل إنتخاباتهم أزمات) ... فأنا باقترح إنهم يغيروا الشعار بتاعهم من "الإسلام هوا الحل" لـ "إللي بالي بالك هوا الحل" .... جايز يعرفوا يخلصوا من حوارات الحكومة ويركزوا بقا في عمل أجندة للإخوان يعرفوا يقنعوا بيها المحترمين إللي في البلد، بدل ما مامفيش حد عارف هما عايزين إيه أصلاً !!!!

إللي بالي بالك هوا الحل

فكر جديد، لشعب فشيخ

صحوة وطنية.. أم نوبة هستيرية؟ - بقلم جلال أمين

 نحن لا نعيش فى عصر انتصار الرأسمالية (ولا الاشتراكية بالطبع) ولا انتصار الديمقراطية أو حقوق الإنسان. كما أننا لا نعيش نهاية التاريخ، كما زعم أحد الكتاب منذ عشرين عاما، ولا عصر صراع الحضارات، كما قال آخر بعده بقليل. نحن نعيش عصر الجماهير الغفيرة: عصر التليفزيون والأقمار الصناعية والقنوات الفضائية، والتليفون المحمول الذى يحتوى أيضا آلة فوتوغرافية وبريدا إلكترونيا وشبكة الإنترنت.

أستكمل قراءة المقال

بجد مقالة من أفضل ما قرأت في تحليل الموقف في مصر النهاردة ... مش بس ماتش مصر و الجزائر .. الموقف المصري كله من كل المواقف ... صحيح إللي عايز يعمل إنقلاب مش محتاج أكتر من مبني اإذاعة و التليفزيون.

تخاريف واحد مبسوط حبتين

إشتري علبة شوكولاتة مستوردة غالية و كلها.

بص على بنت حلوة و إعرف أنها لو عرفتك كويس أكيد هتحبك.

إلعب لعبة مالعبتهاش من و إنت صغير.

إعرق و إنهج و حس إنك عايش.

إطفي نور أودتك شغل التكييف إسمع أكثر مزيكا بتحبها و إسرح معاها.

بص لأهلك و عرفهم قد إيه بتحبهم.

بص للي تحتك و إعرف قيمة كل حاجة معاك.

بص للي فوقيك و إعرف إن رغبتك إنك تبقى زيهم هي اللي مدية طعم لحياتك.

إستمتع بشمس الصيف.. بصلها و قولها إنك مش كارهها.. حتى لو عرقتك و لزقتك..

روح أقعد على البحر.. دخل رجليك في الرمل.. و خرجها.. بطل تفكير.. و إبدأ حس..

في الشتا إنزل تحت البطانية و حط كوباية الشوكولاتة السخنة جمبك.. إبتسم و غمض عينيك و نام.

إشتغل لحد ما تحس إنك مت.. نام ثاني و إشحن و روح موت نفسك ثاني.. وإعرف إنك زودت حاجة للدنيا ماحدش كان هيزودها غيرك.

إعرف إنك كائن مهم و في كل لحظة بتغير إتجاه التاريخ.

بص لشحات واقف جمبك.. ماتديلوش ولا نكلة.. بس سلم عليه و إضحكله و قوله “عامل إيه؟ تمام؟”

سلم على واحد صاحبك و خدوا بالحضن.. و زود مدة الحضن ثانية زيادة.. هتقوله حاجات كثير.. – بس إتأكد إن نيته مش وسخة و إنه عارف إنك “مستقيم” –

بص لبنت مغرورة و إضحك من جواك.

بص لبنت وحشة و عاكسها بنظراتك و إعرف إنها هترجع البيت مبسوطة.

بدون سبب إبعت رسالة لأي حد بتحبه قوله حاجة حلوة.

إفتح شباك العربية و إطلع على طريق سريع خلي الهوا “يطس” في وشك.. صرخ.. بس إتأكد إنك مش داخل على لجنة و إنك لوحدك و مافيش حد تعرفه في العربيات اللي حوليك.

إضربها جزمة.

خلى اللي يكره يكره و اللي يشتم يشتم وإعرف إنهم مضيعين وقتهم.

إتأكد إنك لو عارف إنك هتموت بكرة هتعمل نفس اللي بتعمله دلوقتي.

حب جامد قوي حتى لو حبك مش هيستمر لحد بليل.

كل أكلة حلوة قوي.. بس ماتخليهاش تشبعك.

إشرب مشروب دخلت المطبخ و إخترعته و لو ماعجبكش إرميه في الحوض و إنزل إشرب حاجة ثانية بتحبها.

ماتشربش شيشة أو سجاير.. إشرب الهوا.. إستمتع بيه.. مش هتعرف قيمته إلا لو خلوا الهوا بفلوس.. ساعتها هتستمع بيه كأنه سيجارة حشيش مغربي.

بطل خمرة و مخدرات.. و إتعلم إزاي تستمتع بحتى أوحش الحاجات حوليك.

أكسب نفسك و حب حد بيكرهك.

إكسب نفسك ثاني و حب حد بتكرهه.

إكسب نفسك ثاني و إنسى حد لسه بتحبه من غير ما تكرهه.

إتفرج على ماتش كورة لفرقتين ماتعرفهمش و شجع واحد فيهم قوي.. قوي.. حتى لو كان بيلعب زي الزمالك.

إنزل شجع مع الزملكاوية لما يكسبوا.. حتى لو إنت مش زملكاوي.

إقرا الكلام ده من غير ماتعلق عليه و لو مش عاجبك بطل قراية.

شوف فيلم الكيف و ماتتفرجش على آخر ربع ساعة فيه.

إتفرج على الناظر من أول ما بيظهر محمد سعد.

لما تقابل واحد مش فاكر إسمه و مش بتسلم عليه عادة خده بالحضن و قوله واحشني جدا يا معلم..

إقرا كتاب عن موضوع معقد مانتاش فاهمة و بعدها إنزل مع صحابك.. هتتبسط قوي.

جرب أكلة جديدة في مطعم فخم.. ثمنها يخرب بيتك.. و روح و إنت مبسوط.

شد مع عربية سيات.

إلبس أحلى لبس عندك و إنزل إمشي في الشارع و إنت فارد ظهرك.. و ماتحطش إيديك في جيبك خليهم أحرار.

إشتري ورد لواحدة تعرفها عادي.. و قولها أصلك زي أختي و بعزك قوي.. هتتجنن.

إرقص حتى لو في أودتك و إنت قافلها بالمفتاح.. ممكن تغني كمان و إنت ماسك الفرشة على إنها ميكروفون.

إفتكر قبل ما تنام كل الكلام الحلو اللي سمعت الناس بتقوله عنك.

كل ما تلاقي حد بيحكي عن مشكلة دورله عن الجانب المشرق فيها.. مهما كانت عويصة.. طلعله فيها فوايد و باركله.

كل ما حد يقولك إزيك عامل إيه؟ قوله الحمد لله مبسوط قوي.. قولها بسرعة من غير ماتفكر و إبتسم.. لوحدك هتتبسط فعلا.

شوف إيه أكبر مشكلة في حياتك.. فكر في أسوأ حاجة ممكن تحصل بسببها و هتلاقيها مش هتموتك و هتفضل برضه في الآخر فوق الأرض مش تحتها و إن الدنيا هتمشي و إحمد ربنا.

فكر في الموت كويس.. و إعرف إنه لسة ماجاش و إعرف إنه قبل ما ييجي لازم تعمل كل اللي نفسك فيه.. و لازم تتبسط و ماتضيعش لحظة مدايق مهما كان السبب.

سافر حتة ماروحتهاش قبل كده.. صورها و صور نفسك فيها.. صلي فيها.. أو بوس أرضها.. أو خد منها تذكار و إرجع ثاني نام على سريرك و عرفه إنه وحشك.

إستحمى في نص ساعة.. خلى المية تنزل على وشك و إسمع صوتها كويس.

جيب لنفسك هدية و إستنى لحد عيد ميلادك و إديها لنفسك.

جيب هدية لحد بتحبه من غير مناسبة.. و إديهاله في عدم إهتمام كأنك ماعملتش حاجة غريبة.

إنزل من بيتك بشبشب و شورت من غير ماتسرح شعرك.. و إتأكد من جواك إنه عادي جدا.. أنا مش مهتم.. و خليك واثق من نفسك.

إشرب مية كثير.

ماتغضبش مهما حصل.

أشكر كل الناس بسبب و من غير سبب.

لو حد إتريق عليك إضحك.. حتى لو من جواك بتضحك عليه.

لو حد شتمك حط ده في تانك البنزين بتاعك علشان يبقى طاقة تحركك لقدام.

لو الناس بعدت عنك إعرف لأنكم مش زي بعض.. لا هما وحشين و لا إنت وحش.. إنتم بس مش زي بعض.. و إتبسط إنك مش بتضيع وقتك معاهم.

لو لقيت نفسك لوحدك شوية ده معناه إنك فريد و نادر من نوعك.. و مين في الدنيا يقول إن نوعك غلط أو وحش.. بس إنت تقدر تتأكد إن ده النوع المناسب ليك.. و إتبسط بيه.. و لو نفسك تغيره غيره.. مافيش حاجة بتلزق حتى إسمك و دينك.

بص لإمبارح.. و شوف إتعلمت منه قد إيه..

خطط لبكره بس إوعى تخاف منه .. إزاي تخاف من حاجة إنت اللي بتبنيها أصلا.. حاجة لسة ماحصلتش و ماحدش في الدنيا يقدر يعرف إيه اللي هيحصل فيها..

إستمتع بالنهاردة كويس.. لأن كل نهاردة هيبقى إمبارح بتاع بكرة زي ما كان بكرة بتاع إمبارح..

إسمع أغنية مدحت صالح وانا ويايا بعيش زي المليونيرات و شوفها على اليو تيوب و إضحك منها أو عليها.. بس في الحالتين هتضحك.

لما حد يحكيلك حاجة مملة علشان يبين مواهبه في الحياة إعمل نفسك متهم آخر حاجة و لما يخلص إعمل نفسك منبهر آخر حاجة برضه.. و كمان إسأله عن تكملة الحكاية.. بس ماتعملش كده كثير.. مرة كل فين و فين..

إفتكر أيام لما كنت بتصحى بدري علشان المدرسة.. و لما كنت بتذاكر فيزيا أو تاريخ.. و أهلك مانعينك من النزول و إتبسط إن ده كله خلص و مش راجع ثاني.

إتبسط.. و لو مش عايز تتبسط.. مش هتعرف تعكنن عليا.

لإن أنا مبسوط.

منقول من مدونة حكواتي الصورة بتاعة عمرو سلامة

ضد حجب الحريات بإسم الأخلاق - 2

القضاء المصري حكم بحجب المواقع الإباحية .. والحكومة تبدي "عجزها

يا رب دايماً ماينفعش يبقي فيه حاجة الحكومة تعملها في حرية حركة شبكة الإنترنت. 

ضد حجب الحريات بإسم الأخلاق

صحيت الصبح علي الخبر الجميل ده ... إصطبحا و أصطبح الملك لله.

أنا أعتقد إن حكومتنا يهمها الأخلاق قوي ... أصلها بسم الله ما شاء الله يعني عامله إللي عليها قوي كحكومة ... فاحنا من حبنا فيها عايزنها تبقي هي بابا و ماما و تبقي هيا ضميرنا الحي الصاحي ... إللي بيخلينا مانشوفش الحاجات الوحشة إللي الخواجات بيعملوها علي النت و ماتخليناش نشوف غير إللي الست هايفة وهبي بتعمله هيا و دانا و ماريا و مروة و نجلا و من وقت للتاني بوسي سمير.

أعتقد إن الموضوع واضح .... موقع الإخوان المسلمين موقع إباحي (ماهو إللي بيحرضك تعمل حاجات عيب في الشارع بتخل بالأمن العام) و موقع حزب الغد موقع إباحي هوا كمان (دول بيزوروا التوقيعات يابا ... مش هايعلموك قلة الأدب!) و أي موقع بيتقال فيه كلمة حرة إباحي (يالهوي ... ده بيقول حرة) و إي موقع بيتكلم عن مقاطعة (إنت عايز أمريكا هيا إللي تعمل معانا حاجة قلة أدب) أو عن حق ضايع (يا عم قضيها ... هوا حد لاقي حق أصلاً لما يبقي فيه حبة منه ضايعين) يبقي هوا كمان موقع إباحي.

بس انا أحب أقولهم إن إللي بيستحل حريتي بإسم الأخلاق هوا إللي بيعمل حاجة قليلة الأدب فعلاً و هوا ده إللي المفروض أحجبه من حياتي و أتخلص منه و من تأثيره. 

إحنا إضحك علينا يا رجالة

و الله ده حصل يا رجالة .... إحنا بقالنا 56 سنة مضحوك علينا  .... و أنا كده مضايق .... منه لله بقا توفيق الحكيم

إنها دولة الأنطاع

مش عارف ... أنا حاسس إن مصر بقت دولة للأنطاع، غالباً أعلي نسبة أنطاع في العالم كله
تبقي ماشي في الشارع .... الدنيا زفت و الجو تراب و مش لاقي عربية تركبها في شارع فيصل المرعب، علي فكرة شارع فيصل ده شخصياً ممكن تقعد تكتب عليه سنين و سنين و مش هاتقدر تعرف الخاصية الغريبة إللي فيه إللي بتخلي أي حد بيبدأ في أوله مايوصلش أخره قبل ساعة، رغم إن طوله الكلي مايزيدش عن 12 كيلومتر ، المهم فجاة تلاقي عربية ماشية بضهرها و السواق بتاعها قاعد بيزمر بأسلوب يخليك تفتكر إن الشارع ده الصح بتاعه و إنك كمجرم واقف في طريق مستقبله.
تعدي البيه و تقول مسكين ... أكيد إتزنق في لفة غلط و لا حاجة .... و فجأة تلاقي حد طالع من الشارع إللي قبل الملف بوشه عكس حركة  الشارع عشان ياكل الملف إللي قدامه بدل مايحترم نفسه و يمشي في إتجاة الشارع العادي، و في نفس الوقت الميكروباص المتين بيلف من نفس الملف عشان مايكملش الخط لأخره و يركب زباين، و الناس واقفين إستعداداً إنهم يكبسوا عليه و يلحقلوهم كرسي و لا حتي وقفة ببعض من البقية الباقية من الكرامة الإنسانية فيهم .... يقوم السواق الأولاني داخل في جنب أقرب ثلاثة من إللي واقفين و الميكروباص يبتدي يركب و هوا في نص الملف (يعني في عرض الشارع) و الناس بتجري ..... تحس فجأة إنها حالة من النطاعة العامة منتشرة مابين الناس كلها.
بلاش ... بمعجزة ما تقدر تركب العربية الميكروباص و يادوبك الدنيا تمشي... تلاقي ميني باص (ده إللي هوه الكبير بتاع الميكروباص .. وده له قصة عظيمة برده ... بس ما علينا دلوقتي) واقف في نص الشارع بيحاسب حد نازل و قاعد بيتخانق إن الأجرة غليت و الراجل مصر إنه كل يوم بيركبها بريال (رغم إن الأجرة من ساعة ما وعيت علي الشارع ده و هي عمرها ماكانت بريال)، و ما علينا.
الدنيا تتحرك شوية و بعدين تلاقي السكة كلها مقفولة .... أتاري راجل صاحب عربية كارو (عربجي قد الدنيا) ماشي بيتمختر في الشارع و أكنه ماشي لوحده في الصحرا.
اللطيف في الموضوع إنك توصل لحد محطة المترو ... تقعد تنده علي الراجل بعزمك "علي جنب يأسطي" و هوا و لا هوا هنا .. كأن الطبيعي إن الناس مابتنزلش ... بتركب بس .... لغاية ما يتفضل و يتكرم و يسمعك ... و في اللحظة دي تبدأ مأساة تانية ...  إنك تنزل فعلاً ... و دي إسمها في كتب التاريخ ملحمة (يمكن يكون سبب الإسم مختلف في الكتب دي، بس ده إحساسي الشخصي) سواق الميكروباص مركب بزيادة جداً لدرجة إن مفيش مكان تحط رجلك فيه ... و حتي لما يبقي فيه .. تحس إن النطاعة المتفشية مسيطرة علي الأداء العام للناس ... محدش عايز يتحرك حتي لو خبطته بكتفك بغباوة عشان يتحرك ... تحس إنك خبطت إللي جنبه.
و هنا تبقي وصلت بحمد الله للمترو ... و من هنا تبدأ مأساة تانية .... بس بعدين بقا