أكثر 25 موقع يزورهم المصريين ما بين مواقع التواصل الإجتماعي والتواصل الغير اجتماعي

This summary is not available. Please click here to view the post.

المرة دي كتير كده يا مصريين

إللي يعرفني يعرف إني مش باقلل من حجم مبارك أبدأً ... ده راجل عرف يفضل في الحكم ثلاثين سنة ... إشي فساد وإشي محسوبيات وإشي ضياع أموال عامة وإشي صفقات مشبوه مع إسرائيل وإشي ألعاب مع أمريكا وإشي قمع وإشي تعنت وإشي تعتيم إعلامي وإشي تزوير وإشي بطانة فاسقة .... الراجل بسم الله ماشاء الله ماخلاش.

وأخرها ضحك علي دقون شعب متربي في مؤسسته التعليمية والأمنية والسياسية ... شعب إتقاله إن المتظاهرين هما السبب في إنك قاعد دلوقتي من غير داخلية تحميك ... طب والمظاهرات مالها ومال إن السجون مش متأمنة فمساجين مصر من طره وأبو زعل ووادي النطرون والفيوم يعرفوا يهربوا في يوم واحد ... بسم الله ماشاء الله علي الآداء والتنسيق الإجرامي الواعي.

ويقوم يكمل لعبته ... أنا مش نازل المرة الجاية الإنتخابات ... سيبوني التسع شهور الجايين أرتب مين هاييجي بعدي وهايحميني إزاي زي ما أنا لحد النهاردة حامي الفساد إللي حصل من أيام السادات (مع الإعتذار لأحمد زكي) ... تقوم الناس إللي مش فاهمة إنه كده بيفلت من الحساب تقول الراجل عمل إللي عليه ... سيبوه بقا يكمل شغله .... ماهو أصله كان ظابطها قوي من غير قلق لما هايعرف يخليها جنة في تسع شهور.

تكمل بقا حرقة الدم لما تشوف إللي بيقولوا إن مبارك القائد والرمز وإحنا مانهينش رموزنا .. بس رموزنا تهيننا إحنا مفيش مشكلة ... هو الصراحة رمز فعلاً .. بس رمز الفرعون ... رمز النمرود .... رمز هامان.

الترويش إللي في الموضوع إنه ماعملش حاجة فعلاً ... لا حاسب حبيب العدلي ولا عزل أنس الفقي ولا حاسب أحمد عز وحبس صفوت الشريف ولا اي حاجة خالص ... ياولاد هاتروحوا الملاهي لو قعدتوا مؤدبين ... هييه بابا ودانا الملاهي وجابلنا أيس كريم كمان !!!! إيييييييييييييييييييييه ... إيه العبط ده ... الناس إتعملها عملية إستأصال مخ إمتي ؟؟؟

نيجي بقا للإعلام المخل والمهين ... مش التليفزيون المصري ده إللي قعدنا عشر أيام مش مصدقينه ؟؟ ولا كان فيه واحد بيتفرج عليه ومصدقه وأنا ما أعرفش !!! هو صحيح زمن المعجزات خلص ... بس بردو ربنا قادر علي كل شيئ ... المهم ... الإعلام فجأة يطلع يقول حشود مؤيدة لمبارك ... طب كانت فين دي الأيام إللي فاتت ... يعني هو لازم يقول مش هاترشح علشان الناس ترجع تحبه !!! طب بلاش ... حكم إنت عقلك ... أنا طالع أقول نعم لمبارك .... أطلع بجمل ؟ .... طب إيه ... طالع أقول نعم لمبارك أطلع بقنابل مولوتوف !!!!!!!!!!!!!! ماهو بردو المتظاهرين بسقوط النظام دوول إللي كانوا بيفتشوا الناس علشان ماحدش يدخل بسلاح ... يبقي جت منين قنابل المولوتوف؟؟

نيجي بقا للي خايفين علي أكل عيشهم .... الفضائيات إللي كلها تعلمت الدرس ... هاتقول الحقيقة هانقفلك مكتبك ... هاتقول سلام وإستقرار ولا للفتنة هافتحلك بدل القناة ثلاثة وهاعملك كليبات فيها ناس بتنوح ولابسة إسود ... هاتحمرئ هاحط عليك وهاسحب ترددك وتصريحك ... ولا إنت أقوي من الجزيرة.

عزيزي الرئيس مبارك ... سيلعنك التاريخ حتماً ... وستبقي ذكراك كفرعون سيدنا موسي رمز للشر والفساد والعناد ... عزيزي الرئيس مبارك ... حسبنا الله ونعم الوكيل.

نظام مبارك ... مش هاتقدر تغمض عينيك

شتي يا دنيي

وأدي الحال في جده ... الفيو من جوه العربية يجنن ... خصوصا لما ماتبقاش عارف تروح.

إصحي يا مصر

اصحى يا مصر

اصحى يا مصر

هزى هلالك

هاتى النصر

كونى يا مصر وعيشي يا مصر

مدي اديكى

وطولى العصر

اصحي وكوني وعيشي يا مصر

اصحى يا عامل مصر يا مجدع

وافهم دورك

ف الوردية

مهما بتتعب

مهما بتصنع

تعبك رايح

للحراميه

جهدك عملك

رزق عبالك

عرقك مرقك

ولا يهنا لك

اصحى يا عا مل

غير حالك

صون المصنع

واصنع مصر

اصحى وكونى وعيشي يا مصر

اصحى يا زارع مصر الخضره

قدره وخضره

ونور وجمال

ابدر غيطك

واحمى البدره

ضد الافه

والاستغلال

ارضك عرضك

باب الدار

صبحوا مداسه

للسمسار

نعطش

ولانشربش عكار

وصفه قالوها الحكما يامصر

اصحى وكونى وعيشي يا مصر

واصحى يا جندى

يا تار الشهدا

عمى وخالك

اختى واخوك

لجل ما تهدا وتارك يهدا

فرغ نارك ف اللى خانوك

يابن الشعب يا حامي الشعب

انت املنا فى يوم الصعب

اصحى يا جندى ودق الكعب

حرر مصر وطهر مصر

اصحى وكوني وعيشي يا مصر

قالوا عن الإنتخابات هذا العام

أستقوفتني السنة دي كثافة ما كتب في المنتديات والمواقع الإجتماعية زي الفيس بوك والتويتر عن إنتخابات مجلس الشعب في مصر هذا العام ... ومن أبرز إللي قريته:

بكرة المجزرة يامصريين هههههههههه. اللي قرفان من ريحة الانتخابات يروح يبطل صوته .. علم على أسماء كل المرشحين وبكدة يكون صوتك باطل بدل ما يعلموا هما ع اللي عايزينه آخر اليوم بحماية بلطجية الحزب البلطجي قصدي الوطني .. على فكرة مواليد من 82 ل 92 بالرقم القومي

- ده أحد الأصدقاء صبيحة الإنتخابات بيفكر يحل المشكلة بشكل موضعي ... زي إنه ياخد مسكن بدل ما يروح للدكتور

اللهم أجعل تدبيرهم تدميرهم

- وده فوض أمره لله

Ma tente5bene ya mama awam ya mama ... Da elwatany haya5odny bel tazweer ya mama :D

- وده ضرب خالص ولقي إن الهيس هوا الحل

YA RAB MORASHA7E EL WATANY YET3ADLO WE TB2A 2OR3A :D

- وده رجع للماضي القديم لما كان بيلعب كولو بامية في حوش المدرسة 

هوبا هوبا هوبا .. تامر تحت القبة. هههههههههههه والله مانا عارف دة مجلس شعب ولا سوق خضار

- وده نفس صاحبي إللي كان بيتكلم علي المجزرة فوق ... بس واضح إن التزوير نجحه هوا بالغلط بدل مرشح الوطني ... والملاحظ إنه لسه بيضحك

بكل حب وصفاء وسناء ودعاء ورجاء مبروك للحزب الوطنى :) أكتســــــــــــــــــــــــــــــــــــــــــــــــاح

- ياااااه .. كلمة إكتساح دي ما سمعتهاش من أيام الـ 99% بتاعة عبد الناصر الله يرحمه ويرحم إللي زورهاله ساعتها

ليه الوزراء يبقى ليهم حق الترشح في مجلس الشعب أصلا؟ وكمان يكسبوا؟ هو ينفع واحد يبقى ممثل للحكومة وممثل للشعب في نفس الوقت؟ يعني يغني ويرد على نفسه؟ المفروض بقي يسموا مجلس الشعب الجديد ده بعد نجاح كل الوزراء في الانتخابات مجلس الوزراء

- وده حد فكر يسأل سؤال بجد ... وده وقته يا دكتور ... علي رأي جيم كاري It's showtime

هذا وبعد ماشهدته مصرنا الحبيبة من تزوير معتاد لانتخابات شكليه لا يسعني في هذه الظروف الا ان اقول ....يا خونه انا ماشي

- خدني معاك

ياخبر أسود . انا نفسي أسأل الناس دي سؤال واحد ... انت تعرف ربنا ياعم الحاج؟؟؟ تسمع عنه؟؟؟

- وده تعليقاً علي فيديو مصورين فيه التزوير في قلب اللجنة .. بس عجبتني كلمة تسمع عنه دي

ازاي ممكن حد يستحمل انه يمارس تمثيلية 40 سنة ؟...بجد ...بتخدعوا مين ؟

- ده واحد صاحبي مش فاهم ... أنا بانصحه يروح أي إجتماع في الحزب الوطني وهوا يفهم

شيء مضحك الناس اللي بتتكلم عن مقاطعة الأنتخابات مع العلم ان معظم الشعب المصري لا يمتلك بطاقة أنتخابية أصلاً

- وده حد محترم جدا قرر يفكر بجد ... أحب أقوله هاتتعب

اللي رايح ينتخب يتصل بأي حد كان مزعله ويصالحه وقبل ما ينزل يبوس على إيد أبوه وأمه ثم يتوكل على الله

- وده في يوم الإنتخابات قرر يأمن ضهره

Cairo 2010

هيا دي مصر النهاردة .. أنا ماشفتش الكلام ده أيام إنتفاضة الأمن المركزي ... ربنا ينتعك بالسلامة يا مصر

ماهو مجلس رقاصات أصله

دينا تتراجع عن خوض انتخابات مجلس الشعب وتتفرغ لـ"دقى يامزيكا"

والله أنا شايف إن المفروض إنها تدخل المجلس فعلاً ... فإنه الصراحة دلوقتي لا يليق بحد إنه يدخل المكان ده غير الرقاصات وولاد الش## ...  مشيها ولاد الشعب ... بس بجد أنا جي في بالي السيدة الفاضلة فيفي عبده لما كانت واقفة علي خشبة المسرح وقالت جملتها الخالدة.

إحنا في زمن حزمني يا بابا

إللي بالي بالك هو الحل

في ظل أزمة الإخوان الجديدة في الإنتخابات (وهما الصراحة كل إنتخاباتهم أزمات) ... فأنا باقترح إنهم يغيروا الشعار بتاعهم من "الإسلام هوا الحل" لـ "إللي بالي بالك هوا الحل" .... جايز يعرفوا يخلصوا من حوارات الحكومة ويركزوا بقا في عمل أجندة للإخوان يعرفوا يقنعوا بيها المحترمين إللي في البلد، بدل ما مامفيش حد عارف هما عايزين إيه أصلاً !!!!

إللي بالي بالك هوا الحل

فكر جديد، لشعب فشيخ

هل يقرأ المصريون

يا فرحتي .. 88% من الأسر المصرية مافيهاش حد بيقرأ أصلا ... ده مش معناه إن 22% من الشعب بيقرأ ... ده معناه علي أفضل التقديرات إن فيه بتاع 7~12% من الشعب هوا إللي بيقرب لكتاب.
من النسبة دي بقا فيه 33% بس منهم بيقرأ كتب علمية ... يعني إحنا عندنا نسبة 1% بس تقريبا إللي ليها في قراءة الكتب العلمية ... ده معناه إن من وسط الناس إللي بتشتغل (20% من الناس تقريبا علي قوة العمل)  فيه 5% منهم بس بيدور علي إنه يطور نفسه في شغله أو يفهم هوا أصلا بيشتغل في إيه.
يا فرحتي بيكي يا مصر و بالشعب إللي فاكر نفسه له لازمة في عالم بيتكلم في الثانية الواحدة و ثمنها.

http://www.eip.gov.eg/Documents/StudiesDetails.aspx?id=822

صحوة وطنية.. أم نوبة هستيرية؟ - بقلم جلال أمين

 نحن لا نعيش فى عصر انتصار الرأسمالية (ولا الاشتراكية بالطبع) ولا انتصار الديمقراطية أو حقوق الإنسان. كما أننا لا نعيش نهاية التاريخ، كما زعم أحد الكتاب منذ عشرين عاما، ولا عصر صراع الحضارات، كما قال آخر بعده بقليل. نحن نعيش عصر الجماهير الغفيرة: عصر التليفزيون والأقمار الصناعية والقنوات الفضائية، والتليفون المحمول الذى يحتوى أيضا آلة فوتوغرافية وبريدا إلكترونيا وشبكة الإنترنت.

أستكمل قراءة المقال

بجد مقالة من أفضل ما قرأت في تحليل الموقف في مصر النهاردة ... مش بس ماتش مصر و الجزائر .. الموقف المصري كله من كل المواقف ... صحيح إللي عايز يعمل إنقلاب مش محتاج أكتر من مبني اإذاعة و التليفزيون.

يعني هيا دي الوطنية ؟ ... ماتش كورة و نظيط في الهيصة ؟ ... طب كل واحد علي شغله لإن المشكلة ماهياش حكومة يا أمة ضحكت منجهلها الأمم.

الموضوع أنا حاسس بقا بزيادة ....يعني ماتش كورة و تصفيات كأس عالم ... ماشي .... إنما تتفرج بقا علي المسخرة ... حالة عامة من الإحباط بعد خسارة الماتش .... يعني ما كانش فيه حاجة تحبط قبل الماتش !!! داحنا كان فاضل نبدأ تنظيم حفلات إنتحار جماعي ... يبقي ليه بقا التعلق بقشه نظيط فيها و نحاول نفرح بأي طريقة ولا شكل .... و لا هوا علشان دي الفرحة السهلة ... ناس هاتلعب و فرقة تكسب و إحنا لينا الزيطة ... طب و لما إحنا بلد بتعز الفرحة زي عنيها كده ... مانعمل لروحنا فرحة بجد .... نخلي فيه بلد ينفع نفرح فيها ... ولا هوا لازم يعملولنا علشان إحنا نفرح.

و راخر التانيين ... شعب الجزائر الشقيق .... ده إيه الهبل ده يا ربي .... هوا أنا مكتوب عليا أفضل حاسس إن مافيش دم عند 250 مليون واحد ؟ .... ضرب و غباوة و هبل و سخافة و صفاقة  .... حاجة بجد مالهاش لازمة ... طب يعني أنتوا راخرين بلدكوا خلاص تمام التمام و الدنيا زبادي خلاط و فاضل ماتش كورة علشان تبقوا علي قمة العالم .... بلا وكسة.

هنجيب أجلك إنت ... مع تحيات الحزب الوطني

إلهي ربنا يفضحكوا كمان و كمان أكتر ما أنتوا مفضوحين كده

النهاردة ببص في أخبار برامج الأمن علي موقع Network World و ألاقي إسم مصر منور في الموقع، قلبي إتشرح و قولت قولت زي ما رمضان السكري قال لإبنه كمال في مسرحية العيال كبرت "ما داهية لتكون بخير" ... و فعلاً إللي حسبته لقيته... بلدنا بخير و بتتقدم بينا.

47 مصري متورطين في أكبر عملية إحتيال إليكتروني باستخدام نظام النصب الإليكتروني Phishing Attacks و مورطين معاهم 53 أمريكي يسحبولهم الفلوس المسروقة من الحسابات المخترقة ... هيا دي الريادة ... المصريين هما إللي مشغلين المصيبة دي و مشغلين معاهم الأمريكان .... و الله دا إحنا عدينا القراصنة الصوماليين و بقينا شغاليين دولي و علي كبير قوي.

Operation Phish Phry hooks 100 in U.S. and Egypt

طب و النبي دي مش قلة أدب !!!

وزير الاتصالات يتهم شركات المحمول بـ«حرق الأسعار».. ويهدد بمنعها من إضافة مشتركين جدد.

مهزلة جديدة تضاف لوزارة الإتصالات إللي ريحتها فاحت قوي و بقت مزعجة أكتر بكتير من فوايدها.

طب بشير عقيل و المصرية للإتصالات و قلنا شركة بردوا و يهمها مصلحتها فوق أي حاجة تانية ... إنما تبقي كده ... طب وزير ليه بقا مدام شغلتك إنك تحمي مصالح المشغلين .... أمال مصالح الجمهور فين ... الشعب إللي إنت المفروض بتخدمه قبل أي حد ... و لا هوا إللي بيدفع بس هوا إللي بياخد خدمة.

بس مش هاتبقي جديدة علي وزارة بتحاول توقف نمو الإتصالات بإنها تحط تحديد لسرعة الإنترنت في مصر ... أنا أفهم إن شركة لوحدها تعمل كده (يعني فودافون من الأول كان عندها حد في خدماتها .. بس حد معقول .. يعني 100GB لسرعة الـ 1Mbps) يعني من الأخر بتحمي الخدمة بتاعتها ... مش بتقفل علي قدرتك إنك تستعمل الخدمة إللي إنت بتدفع فيها قد كده كل شهر .. و ياريت عاجب.

الأرقام إللي موجودة جميلة جداً و بتقول إن إنت لو باشا و بتدفع لشركة الإنترنت 2400 في أول كل شهر (إللي هوا يجيبلوا قسط عربية متوسطة) فإنت من حقك تستعمل الخدمة نسبة 5% بس من إجمالي الشهر ... و الباقي منها بتستعمل سرعة ما قبل عصر الـ ADSL أصلاً

ضد حجب الحريات بإسم الأخلاق

صحيت الصبح علي الخبر الجميل ده ... إصطبحا و أصطبح الملك لله.

أنا أعتقد إن حكومتنا يهمها الأخلاق قوي ... أصلها بسم الله ما شاء الله يعني عامله إللي عليها قوي كحكومة ... فاحنا من حبنا فيها عايزنها تبقي هي بابا و ماما و تبقي هيا ضميرنا الحي الصاحي ... إللي بيخلينا مانشوفش الحاجات الوحشة إللي الخواجات بيعملوها علي النت و ماتخليناش نشوف غير إللي الست هايفة وهبي بتعمله هيا و دانا و ماريا و مروة و نجلا و من وقت للتاني بوسي سمير.

أعتقد إن الموضوع واضح .... موقع الإخوان المسلمين موقع إباحي (ماهو إللي بيحرضك تعمل حاجات عيب في الشارع بتخل بالأمن العام) و موقع حزب الغد موقع إباحي هوا كمان (دول بيزوروا التوقيعات يابا ... مش هايعلموك قلة الأدب!) و أي موقع بيتقال فيه كلمة حرة إباحي (يالهوي ... ده بيقول حرة) و إي موقع بيتكلم عن مقاطعة (إنت عايز أمريكا هيا إللي تعمل معانا حاجة قلة أدب) أو عن حق ضايع (يا عم قضيها ... هوا حد لاقي حق أصلاً لما يبقي فيه حبة منه ضايعين) يبقي هوا كمان موقع إباحي.

بس انا أحب أقولهم إن إللي بيستحل حريتي بإسم الأخلاق هوا إللي بيعمل حاجة قليلة الأدب فعلاً و هوا ده إللي المفروض أحجبه من حياتي و أتخلص منه و من تأثيره. 

أدي أخرة إللي يسيب مصريين علي الإنترنت

إحنا إضحك علينا يا رجالة

و الله ده حصل يا رجالة .... إحنا بقالنا 56 سنة مضحوك علينا  .... و أنا كده مضايق .... منه لله بقا توفيق الحكيم

خبر الموسم

في تمام الساعة العاشرة و النصف من مساء يوم العشرين من شهر يوليو لعام 2008 الموافق السابع عشر من رجب للعام 1429 هجرية، تأكدت الأنباء التي كانت تتردد منذ بضعة أيام حول الحدث الأهم في عام 2008.

هذا الحدث يعتبر بمثابة نقلة نوعية و هامة في تاريخ التعليم المصري (و العربي بشكل عام)، هذا الحدث الذي لن يتكرر في التاريخ و ربما يبدأ التأريخ الجديد للواقع المصري باستخدامه.

في هذا التاريخ تم إعلان نتيجة طلبة العام الخامس من كلية التخطيط الإقليمي و العمراني، و التي تتضمن نتيجة 141 من طلبة التخطيط، يعتبر أبرزهم هذا العام .... الطالب أحمد محمد هشام، الذي إستطاع و بمجهود إنساني و ذهني كبير ، و بدعوات من كل من قابله في هذا المشوار الطويل أو عرفه من قريب أو بعيد أن يصبح حديث الأوساط العلمية و السياسية و الفنية، و ذلك بعد أن شكل قضية تخرجه موضوع من أهم الموضوعات المطروحة علي الساحة العربية و التي لا نبالغ إن قلنا أن الوضع في لبنان قد فقد جزأاً هاماً من إستقراره بسبب سخونة هذه القضية و تضارب الآراء و الأقوال فيها.

إن هذه القضية التي تعبر و بكل صدق عن الموقف الحالي لمنظومة التعليم المصرية و لم تستطع أن تكون أقل من قضية التوريث أو أزمة رغيف العيش و مستقبل المنطقة ببقاء الإحتلال الأمريكي بالعراق و العلاقات المتوترة بين الدول العربية و إسرائيل، هذه القضية التي ستبقي أعواماً و أعوام في ذهن الشارع المصري و العربي.

تخرج الطالب بتقدير جيد لمشروع التخرج و تقدير عام مقبول، و أستطاع أن يجتاز هذه المرحلة الإنسانية بنجاح، ليستحق من كل من عرف هذه النتيجة كلمة واحدة:

"كفارة يا شيخ"

خلصت يا عالم

إمبارح كان مناقشة مشروع تخرجي (كلاكيت ثاني مرة) و المرة دي نسب النجاة و الخروج من المعتقل بتعلي جداً (بس أنا عمري ماهصدق لغاية ماشوف نتيجتي بعيني ... إللي إتلسع من الشوربة و الزبادي بيمشي ينفخ في الهوا)

إن شاء الله يوم النتيجة كلكم معزومين عندي في البلوج.